Al Nahar TV
Menu
السؤال ده بيسأله أي حد بيفكر يسوّق للمنتج بتاعه على الفيسبوك، وجرب يشتغل أورجانيك (من غير إعلانات يعني) بس المحتوى بتاعه طبعًا ماظهرش قدام طوفان المحتوى اللي بيتعرّض له مستخدمين فيسبوك وخصوصًا إن فيه منه كتير عبارة عن إعلانات. السؤال ده سؤال وجيه طبعًا ولكن ملوش إجابة محددة لإن فيه عوامل كتير بتتحكم فيه
الهدف: يعني انت عايز تدفع كام عشان تاخد إيه. زي ما حد يسألك ادفع كام عشان اشتري بيت؟ طب البيت ده فيلا ولا قصر ولا شقة ولا ستوديو، وموجود فين ومساحته قد إيه؟ كذلك الإعلان ده انت عايز منه إيه: الناس تشتري المنتج بتاعك ولا تنزّل الأبليكيشن ولا تعمل لايك لصفحتك؟ طب عايز كام حد يسألك عن سعره أو كام حد ينزّل الأبليكيشن؟
في البيزنس لازم أي فلوس تدفعها ترجعلك بالإضافة للربح. وهو ده اللي تعريفه العائد على الاستثمار
الفيسبوك بيتعامل بطريقة الـبيد يعني مزاد، وبيحسب كل واحد بيظهر له الإعلان (إمبريشن) وكل واحد بيضغط على الإعلان بتاعك (كليك). كل ظهور أو كل ضغطة تمنها بيقل حسب شوية عوامل هنتكلم عليها دلوقتي. المطلوب إن أكبر عدد من جمهورك يضغط على الإعلان بالميزانية اللي انت حاططها، سواء هيضغط على شوب ناو أو إنستول آب أو ليرن مور ويدخل على الموقع. ده يحصل ازاي بقى؟
الفيسبوك بيفلتر الإعلانات إذا كانت مناسبة للجمهور ولا مش هتهمه بناءً على شوية حاجات
هدف الإعلان اللي بيتطلب منك في الـبيزنس مانجر (يعني لو قررت إن هدفك إن الناس تنزل الأبليكيشن ماتقولش للناس تعالوا اشتروا المنتجات اللي عليه. ده هدف وده هدف تاني، وده ليه نتايج وده ليه نتايج تانية)
الجمهور المستهدف وبيستخدموا فيسبوك امتى وهل انت فاهم الجمهور المستهدف ولا لأ
هتنزّل الإعلان ده فين على الفيسبوك: على الجنب ولا في الصفحة الرئيسية ولا في فيديو
لو الحاجات دي انت مش فاهمها كويس، سعر الضغطة هيبقى عالي
من ضمن الحاجات اللي هتساعدك هي الـريتارجتينج، يعني إعلانك يظهر للجمهور اللي بيتفاعل معاك، يعني تضرب على الحديد وهو سخن، مش لسه بقى بيكتشفوا انت مين وبتعمل إيه
ممكن تعمل إعلان وتلاقي الـكوست بير كليك كبيرة، فتوقفه وتعدّل في الكونتنت المكتوب أو الديزاين، لإنه مش عامل التأثير المطلوب. وممكن من البداية تجرب إعلانين بنفس المضمون مع بعض الاختلافات مع مجموعات مختلفة من الجمهور وتخليه دارك (مش باين على صفحتك يعني بيظهر بس على الصفحة الرئيسية للجمهور المستهدف) وتشوف أنهي جاب نتايج أحسن
ممكن تعمل غلطة صغيرة لكن ممكن تضيع مجهودك كله وهي إن مايبقاش فيه كول تو أكشن، يعني الجمهور مافهمش انت طالب منه إيه في الآخر
من الآخر عايز رقم واضح؟ وفقًا لموقع
(Statista)
متوسط الـكوست بير كليك بالنسبة لإعلانات فيسبوك بيتراوح بين 0.18 و0.85 دولار وده حسب المجال يعني أقل سعر بيكون في مجال الأكل وأعلى سعر في مجال التكنولوجيا. احسبها بقى ده ممكن يساوي كام حسب ميزانيتك
إعلانات الفيسبوك سهلة في استخدامها بس صعبة في تحقيق نتايج معاها، لإنها بتحتاج وقت وخبرة وتجربة كتير، فالأفضل إنك تستعين بـديجيتال ماركتنج إيجنسي هي اللي تمسك لك كل ده، وحتى الفلوس اللي هتدفعها لهم بالإضافة لميزانية الإعلانات، ده غير لو هيمسكوا السوشيال ميديا بتاعتك من الأول للآخر، هتبقى أوفر من إنك تمشي الموضوع ده بنفسك عشان توصل لنفس النتايج لو قدرت
فيه نقطة كمان لازم نأكّد عليها، إن السوشيال ميديا دورها بيقف لحد ما العميل يضغط على الإعلان بتاعك، بس ده مش معناه إن العميل هيشتري. يعني ممكن الـماركتر يكون جايب نتايج كويسة جدًا على السوشيال ميديا، بس أنت تقول له أنا استفدت إيه مانا مابعتش. هنا بنشوف المشكلة فين في المراحل اللي بعد كده: السعر مش مناسب؟ خدمة العملاء سيئة؟ جودة المنتج سيئة فلما العميل بيشوفه على الواقع بيحبط وبيقرر مايشتريش
We are a set of Experts with many years of experience in the Digital communication industry. We offer innovative Digital marketing solutions for brands by implementing a Deep knowledge of marketing science.
Copyright © 2024, Growtheg LLC. All Rights Reserved.
