عشان إيميلك مايبقاش مصيره السبام!

كثيرون حول السوشيال ميديا ماركتنج قليلون حول الإيميل ماركتنج

عندنا كام سؤال لازم نسألهم: ليه اعمل إيميل ماركتنج هستفيد منه إيه؟ إيه الأدوات اللي هستخدمها عشان انفذه؟ وطبعًا إيه الحاجات اللي لو عملتها هوصل لأفضل نتيجة منه؟

إيه اللي يخليني اعمل إيميل ماركتنج كامبين أساسًا؟

فيه كام إيميل بيوصلك مقابل كم المحتوى اللي بتتعرض له من السوشيال ميديا؟ قليل جدًا طبعًا. الرسالة الي بتوصلك على الإيميل طالبة منك حاجة أنت بالتحديد، فعلى الأقل، هتاخد من انتباهك ثواني عشان تعرف الموضوع مهم ولا لأ

مهمتك بقى إنك تجذب العميل من خلال الإيميل إنه ياخد رد الفعل اللي أنت عايزه. إيه بقى الهدف اللي عايز توصل له من الإيميل ماركتنج؟ تزوّد مبيعاتك ولا تزوّد الترافيك على موقعك؟ تعرف الفيدباك بتاع العملاء؟ تكون على تواصل معاهم بآخر أخبارك؟

عمومًا، ماتعملش أي حاجة في الماركتنج إلا وأنت عارف الهدف منها عشان ماترميش مجهودك وفلوسك في الأرض. بمعنى إنك ماتعملش إيميل ماركتنج كامبين على أساس تبقى بتدق كل الأبواب وخلاص، وده ينطبق على أي وسيلة بتستخدمها في التسويق

عايز بقى مانوصلش لمرحلة إن الإيميل يتحول سبام أو لعملاء بيعملوا أنسبسكرايب؟

يبقى لازم تقدم حاجة للناس اللي بتبعت لهم، على أساسها هياخدوا الأكشن اللي يتوافق مع أهدافك: ممكن تبقى إنفيتيشن لإيفنت أو كوبون خصومات (الموضوع ده هيفرح أي حد مهتم بالمنتج بتاعك، وفيه براندات بتستخدم الخصومات في إنها تجمع إيميلات العملاء، يعني هنبعتلك على الإيميل كوبون خصومات) أو نيوزليتر فيه أهم محتوى قدمته على موقعك

كمان لازم تتأكد إن الجمهور ده مهتم بإيميلاتك

يعني ماتشتريش إيميلات تبعت لها رسايلك، لإن ببساطة الناس دول كلهم هيعملولك أنسبسكرايب أو هيحولوك على السبام. ممكن تجيب قائمة بإيميلات ناس شغالة في شركة أو طلبة في جامعة، وتقدم لهم شيء مخصوص ليهم، لكن مش أي مجموعة عشوائية

لا تضع البيض كله في سلة واحدة: بما إنك بتبعت إيميل مخصوص لكل عميل، أو ده اللي ظاهر له على الأقل، يبقى أنت محتاج تقسم الجمهور بتاعك لمجموعات حسب اهتماماتهم، وده هيسمح لك تكلم كل عميل على حدة (مش بالظبط أكيد بس بصورة أكبر من السوشيال ميديا على الأقل). كمان هيساعدك تختبر المحتوى اللي بتقدمه وتشوف بيجيب نتيجة ولا لأ

طب هتعرف منين؟

فيه مجموعة من الأدوات اللي هتساعدك تعمل إيميل ماركتنج كامبين وتوزعها وتشوف نتيجتها زي هوبسبوت إيميل ماركتنج وسندر وسيندينبلو وأومني سند وسيندبالس وغيرهم

عشان تفهم النتايج اللي بيحققها الإيميل ماركتنج فيه كذا مصطلح محتاج تفهمه

قابلية الوصول: يعني الإيميل بيوصل لصندوق الوارد بتاع الجمهور أصلًا ولا بينزل في السبام

معدل فتح الإيميل: الناس بتفتح الإيميل ولا الجواب بيبان من عنوانه وبيحسوا إن الموضوع مايهمهمش

كليك ثرو ريت: بيدوسوا على اللينك اللي بتحطه عشان الناس تاخد الأكشن المطلوب؟

أنسبسكرايبس: كام واحد بيلغي الاشتراك اللي بيخليك تبعت له إيميلات؟

وزي أي محتوى بتعمله أو مجهود بتبذله في الماركتنج، لازم كل شوية تراجع النتايج عشان تعرف ازاي ممكن تحسن النتايج دي

نقطة مهمة: أوعى تشيل اللينك بتاع أنسبسكرايب من الإيميل بتاعك على أساس إن كده الناس هتضطر تشوف الإيميل وتتفاعل معاه. لأ، هو اللي هيحصل إن الإيميل هيتحوّل لسبام من تلقاء نفسه، ولو ده ماحصلش، العميل نفسه ممكن يحوله لسبام، ودي حاجة من ضمن الحاجات اللي ممكن تقلل قابلية الوصول اللي اتكلمنا عليها من شوية. وبرضه كمان إن عنوان الإيميل مايبقاش موضح محتواه أو إن اسم وعنوان شركتك مايبقوش موجودين في الإيميل

أهم حاجة إن المحتوى بتاعك يكون سهل وجذاب

لو العميل تاه في الإيميل هيقفله، ويقدم حاجة حتى لو معنوية. يعني لو بتبيع ملابس، الـنيو كولكشن المفروض يبقى خبر مهم لزباينك، فدي حاجة ممكن تستخدمها. كمان لازم يبقى مطلوب من العميل حاجة واضحة اللي هي الـكول تو أكشن، زيه زي أي ماركتنج: يدخل على موقع، يستخدم كوبون خصم، يشارك في استبيان، المهم يكون شايفها كويس عشان ياخد الخطوة دي فعلًا