كتابة محتوى جذاب بدون ما تدفع دولار واحد

أي حد عايز يسوق منتجاته على السوشيال ميديا

بالنسبة له سلاح ذو حدين: أي حد ممكن ينتشر عليها، بس في نفس الوقت ناس كتير بتعرض منتجاتها، فازاي هتتشاف وسطيهم؟ وفلنفترض إن ميزانيتك ماتسمحش بدفع إعلانات على وسائل التواصل الاجتماعي، ازاي المحتوى بتاعك هيظهر؟ المقال ده هيديك شوية أفكار تساعدك على كتابة محتوى جذاب بدون ما تضطر تدفع إعلانات

: فيد جمهورك

جمهورك لسه مايعرفكش، وبالتالي ماينفعش طول الوقت تقول له اشتري اشتري. قدم السبت عشان تلاقي الأحد. قدم له معلومة في مجال خبرتك عشان يهتم يتابعك. اتكلم عنه في المحتوى بتاعك بالشغف اللي خلاك تشتغل فيه

: تفاعل معاه

اسأل الجمهور واتكلم عن مشاكله وهزر معاه، حتى وأنت بتعمل عروض، اللغة اللي هتستخدمها هتبين أنت عايزه يشتري منك بس ولا بتحاول تتواصل معاه كمان. يعني لو بتعمل عرض في آخر الشهر للطبقة المتوسطة، تقدر تكلمهم عن إن المرتب بيخلص والعرض هيساعدك تكمل بيه وهكذا

: ماتكتبش محتوى كتير وخلاص

برغم إن الاستمرارية والانتظام في النشر مهمين، لكن حاول إن المحتوى بتاعك يكون دايمًا بيقول حاجة، مش مجرد بتنشر وخلاص

: شوف محتوى المنافسين عامل ازاي

قبل ما تبدأ واختار بعدها الطريقة اللي هتعبر عن منتجك: هل يناسبه أكتر الطريقة الرسمي ولا الهزار والضحك؟ بنكلم رجالة ولا ستات ولا أمهات مثلًا؟

: قول للجمهور انت طالب منهم إيه

عايزهم يشتروا ولا ينزلوا أبليكيشن ولا يردوا في الكومنتات؟
ده اسمه دعوة إلى الإجراء

: استعين بالموظفين

الموظفين بتوعك ممكن يساعدوك في إنك تخلي البراند بتاعتك لحم ودم. ممكن تنقلوا كواليس شغلكم ويومياتكم، فالجمهور يبقى على علاقة بيكم ويحب البراند

كل واحد فيهم بيعرف يعمل حاجة ممكن يفيد بيها الجمهور، يعني لو عندك مطعم، كل شيف متخصص في حاجة ممكن يقول نصائح وحيل للجمهور، وكل حد فيهم هيكون عنده مهارة بره الشغل: فيه اللي عنده استعداد يطلع قصاد الكاميرا وفيه اللي هيقدر يصور بشكل كويس

طب لو محدش تطوع إنه يعمل كده؟

تقدر تشجعهم بمسابقة مثلًا يكون هدفها إن الناس تعمل لمنتجاتك ريفيوهات أو اللي هيعمل منشن لأصحابه على بوست معين هيكسب هدية قيمتها مغرية

: جرب كتير واتعلم

مفيش حاجة بتظبط من أول مرة حتى لو دافع إعلانات على فكرة. المهم تتابع ردود الفعل. شوف إيه اللي عجب جمهورك وإيه اللي تجاهله. اعرف الأوقات المناسبة وعدد المواد المنشورة كل يوم، وحاول لا تقل ولا تزيد عنها. وزي ما أنت بتقرأ المقال ده دلوقتي، اقرا واتفرج عن أي حاجة عايز تنفذها وبقى سهل دلوقتي تلاقي دروس تعليمية لكل حاجة للمبتدئين

توفر وقت ولا فلوس؟

والله ده اختيارك. لو دفعت فلوس لحد يمسك لك السوشيال ميديا أو يساعدك فيها، هتوفر وقت. لو مادفعتش، هتعمل ده بنفسك وهتتكلف شوية وقت ومجهود

: استخدم أدوات مجانية

ممكن تستخدم أدوات تصميم بسيطة ومجانية زي

Canva
Adobe express

عشان تعمل تصميم بسيط وشيك للمنتج بتاعك. كل اللي هتعمله إنك هتشيل حاجة وتضيف حاجة بدون ما تحتاج ديزاينر. وفيه كمان أدوات الذكاء الاصطناعي اللي هتساعدك تكتب محتوى زي:

Bing
ChatGPT

على فكرة الذكاء الاصطناعي ممكن يساعدك في كل خطوات التسويق وده مفرود له مقال لوحده