ممكن استخدام الذكاء الاصطناعي يخليك سوبر ماركيتير؟

قلقان من إن الذكاء الاصطناعي ياخد مكانك في الشغل؟

في الحقيقة، الذكاء الاصطناعي بيتطور بسرعة كبيرة، وكمان تحليل شركة الاستشارات الإدارية الأمريكية “ماكنزي” لـ400 حالة قال إن التسويق هو أكتر مجال ممكن الذكاء الاصطناعي يساهم فيه. ودراسة تانية عملتها جمعية التسويق الأمريكية قالت إن تطبيق الذكاء الاصطناعي زاد بنسبة 27٪ في عام 2018. ده من خمس سنين يا حلو، تخيل بقى دلوقتي

ولكن الخبر الكويس إن الذكاء الاصطناعي لسه ماتطورش للدرجة اللي تخليه ياخد مكانك بشكل كامل. المرحلة اللي احنا فيها دلوقتي هي إننا نقدر دلوقتي نستخدمه لصالحنا عشان يساعدنا في التسويق. بروفيسور كريم لاخاني، مؤسس مختبر هارفارد لعلوم الإبداع ومؤلف كتاب “التنافس في عصر الذكاء الاصطناعي”، بيقول إن الذكاء الاصطناعي مش هيحل محل الإنسان، لكن استخدامنا ليه هو اللي هيكتسح، يعني تقدر تبقى سوبر ماركتير باستخدامه

طب تقدر تعمل إيه بالذكاء الاصطناعي كشخص شغال في التسويق؟

: تحليل البيانات

أكتر حاجة يقدر يتعامل معاها الذكاء الاصطناعي هي البيانات الكتيرة. فيه أدوات زي

Optimove
Peak.ai

ممكن تستخدمها بتحلل بيانات العملاء من كل المصادر زي السوشيال ميديا وغيرها وعادات شراء العملاء بتوعك، وترجع تقسمهم وتقول لك مثلًا إيه المنتج اللي ممكن يبيع أكتر. عارف ده معناه إيه؟ يعني أنت ارتاحت من جزء كبير من المجهود اللي بتبذله عشان تدرس جمهورك أو المجهود اللي لسه هتبذله في محتوى عن منتج مش هو أكتر حاجة هتجيب مع جمهورك

: المهام الإبداعية

الجزء ده بالذات بيرعب البشر لإنه كان يبان حاجة إنسانية جدًا التكنولوجيا مش ممكن تعملها، ولكن لو فكرت في العملية الإبداعية بتتم ازاي هتلاقي إن مخك بيجمع كل الحاجات اللي بيشوفها وبيحاول يطلع منها حاجة جديدة، وده اللي بتحاول التكنولوجيا إنها تعمله، بس طبعًا الفرق في التجربة الإنسانية والمشاعر اللي بنحس بيها. وزي ما بروفيسور لاخاني قال الذكاء الاصطناعي مش هيستبدلنا، لكن استخدامنا ليه هو اللي هيحل محل قدراتنا الحالية. تعالوا نتكلم عن التصميم والكتابة

: التصميم

أحيانًا التصور اللي في دماغك عن صورة معينة عايز تستخدمها في تصميم مابيبقاش موجود، لكن انت تقدر تعمل الصورة اللي أنت محتاجها باستخدام الذكاء الاصطناعي، لكن الأدوات اللي من النوع ده وخصوصًا المجانية، لسه بتتعلم، فممكن تلاقيها مطلعة نتايج غريبة في البداية لحد ما توصل للنتيجة اللي أنت عاوزها.

عندك مواقع زي

Midjourney
Adobe Firefly
Dreamstudio

تقدر تحول لك أي نص تكتبهولها لصورة بس دول بفلوس. فيه تطبيق

WOMBO dream

ده مجاني بس فيه اختيارات بريميوم

Design.ai

كمان موقع بيسمحلك تعمل ديزاينات باستخدام الذكاء الاصطناعي ولوجوهات وفيديوهات فيها فويس اوفر بمجرد كتابة السكريبت ليها، وخد من ده كتير بقى. فيه مواقع تقدر تحول لك مدونة أو مقال أو أي محتوى لفيديو زي

Lumen5
Biteable
Animoto
Magisto

: كتابة المحتوى

ChatGPT

واحد من أشهر تطبيقات الذكاء الاصطناعي على الإطلاق، وميزته إنه بيدعم اللغة العربية ومجاني، وممكن يطلع لك أفكار وبترجع تحولها من خلاله برضه لمحتوى كمان

Anyword

بيطلع محتوى كويس جدًا لكنه مدفوع بس فيه خدمات مجانية برضه ومش بيدعم اللغة العربية، ودي نقطة مهمة برضه: إنك لو محتاج محتوى عربي، هتدور على النقطة دي.

عايز بقى تعرف إيه اللي ناقص في محتوى الموقع الإلكتروني بتاعك، ممكن تستخدم

Marketmuse

اللي يحلل المحتوى بتاعه بالكامل ويقول لك إيه اللي ناقص فيه، وبيقول لك كمان الترتيب بتاعك على محركات البحث حسب الكيوورد، يعني بيساعدك في تحسين محركات البحث

وفيه خدمات مجانية بس مناسبة لحد ماعندوش كم كبير من المحتوى

: خدمة العملاء

أكيد اتعاملت مع

Smart assistant

أو جربته قبل كده. التكنولوجيا اللي توصل للمرحلة دي تقدر تقدم لك خدمة عملاء بسهولة. أكيد البنك بتاعك بيقترح عليك تتعامل مع المساعد الذكي الأول ولو ماقدمش اللي أنت محتاجه، تقدر تكلم خدمة العملاء بعد كده، توفيرًا للوقت والمجهود والفلوس

ممكن فريق التسويق يوفر خدمة عملاء مجانية من خلال موقع

Tidio

اللي بيقدم لايف شات، وبيقدم كمان تحليل للبيانات بس لو دافع، وكمان بيقدم لك خدمة إيميل ماركتنج كمان وفيها المجاني، اللي بيقدم لك قوالب للـإيميل ماركتنج (وممكن تعمل المحتوى بتاعه من خلال أدوات الذكاء الاصطناعي لكتابة المحتوى) وفيه المدفوع (بعشرة دولار في الشهر)، اللي بيقسم الإيميلات اللي عندك حسب الجمهور ويحلل بياناتها

كده أنت حطيت رجلك على أول طريق استخدام الذكاء الاصطناعي في التسويق

بس دي نقطة في بحر المواقع والتطبيقات اللي ممكن تساعدك. دور وجرب وشوف إيه أكتر حاجة هتقدم لك اللي أنت محتاجه، لكن لو لاحظت مفيش حاجة بتقوم بوظيفتك من الألف للياء ولا ليها لمستك البشرية ورؤيتك في التسويق لحد دلوقتي على الأقل